Godfrey Moabi

Godfrey Moabi was die afgelope 23 jaar deel van die span wat gehelp het om Radiokansel 657AM en die Kansel media-handelsmerk te laat groei. Hy is ‘n vaardige kommunikeerder en maak gebruik van sy talent om die evangelie van Jesus Christus te verkondig.

Hy het in Zeerust grootgeword en ook sy passie vir radio daar ontdek. Ten spyte van sy passie vir radio en vasberadenheid om ‘n radio-aanbieder te word, het hy later van plan verander weens die inspraak van mense. “Toe mense my vra wat my planne vir my toekoms was, het ek gesê ek gaan ‘n busbestuurder word, en hulle was tevrede daarmee,” sê Godfrey. Hy was egter steeds oortuig, diep in sy hart, dat hy op die radio wou wees.

Godfrey het later uitsaaiwese gaan studeer en vir verskeie gemeenskapstasies in Johannesburg gewerk voordat hy in 1997 by Radiokansel aangesluit het. Hier kon hy sy drome vervul om ‘n radio-aanbieder te wees en die Goeie Nuus te versprei.

Hy is met Pertunia Moabi getroud, en hulle het vier kinders. Hy is ook passievol oor plaaslike sokker en besigheid. Een van sy passies is om te sien hoe mense suksesvol word en om hulle by te staan op hulle reis na oorwinning. Hy moedig jongmense aan om hulle drome na te streef met die aanhaling.

Doen wat jy liefhet, en jy sal nooit ‘n enkele dag van jou lewe hoef te werk nie.

Skakel in saam met Godfrey Moabi op Radiokansel 657AM vir Thursday Live en Intimate Moments.